“Qarabağ” UEFA Avropa Liqasında “Vilyarreal”la keçirəcəyi oyun üçün İstanbuldadır. Görüşdən əvvəl ənənəvi mətbuat konfransı təşkil olunub. Ağdam klubuna rəhbərlik edən Qurban Qurbanov ordumuzun şanlı qələbələrini xatırladaraq, futbolçuların da böyük ruh yüksəkliyi ilə mübarizə aparacağını bildirib.
Dağlıq Qarabağda hərbi əməliyyatlar səbəbindən UEFA “Qarabağ” – “Vilyarreal” matçının neytral meydanda keçiriləcəyi barədə qərar vermişdi. Komandamızın istəyinə uyğun olaraq görüş qardaş ölkə Türkiyədə təşkil olunacaq. Görüşdən əvvəl baş məşqçilər mətbuat konfransında matçla bağlı fikirlərini bölüşüblər. Ağdam klubuna rəhbərlik edən Qurban Qurbanov ordumuzun şanlı qələbələrini xatırladaraq, futbolçuların da böyük ruh yüksəkliyi ilə mübarizə aparacağını bildirib: "Ölkəmizdən kənarda oynamaq bir az çətindir. Anlayırıq ki, hər bir Azərbaycan vətəndaşı üzərinə düşən vəzifəni yerinə yetirir. İnanıram ki, yaxın vaxtda bütün torpaqlarımız geri qayıdacaq. Biz də "Qarabağ" komandası kimi məsuliyyətimizi dərk edirik. Layiqli nəticə qazanmaq üçün əlimizdən gələni edəcəyik. Fikrimiz cəhbədə və əsgərlərimizin yanında olsa da, oyun zamanı futbol meydanında qələbəyə nizamlanacağıq. Düzdür bütün qarşılaşmalarımız ölkə xaricində keçirəcəyik. Amma Türkiyədə özümüzü evdəki kimi hiss edirik. Bu, böyük üstünlükdür. Sıx qrafikimiz var deyə gənc futbolçulara da oynamaq imkana yaradacağıq".
“Vilyarreal”ın baş məşqçisi Unay Emeri isə əsasən “Qarabağ”ın avrokuboklarda təcrübəsindən söz açıb: "Qarabağ”ın heyətində müxtəlif ölkələrdən mahir futbolçular çıxış edir. Avropada oynamağa öyrəşiblər. Bir-birlərini çox yaxşı başa düşürlər. Rəqib öz meydanından uzaqda olsa da, mətbuatdan oxuduğuma əsasən deyə bilərəm ki, İstanbulda öz evlərindəki kimi oynayacaqlar. Ona görə də həddən artıq motivasiyalı olmaqları bizə çətinlik yarada bilər".
Qeyd edək ki,Avropa Liqasının qrup mərhələsinin 2-ci turunda keçiriləcək "Qarabağ" - "Vilyarreal" matçını çexiyalı Pavel Orel idarə edəcək. Oktyabrın 29-da "Başakşehir Fatih Terim" stadionunda keçirilən qarşılaşma Bakı vaxtı ilə saat 21:55-də başlanacaq.